Yangi saylangan prezident Donald Tramp esa bu qarorni qoraladi.

“Umid qilamanki, amerikaliklar ota va prezident sifatida bunday qarorga kelganimning sababini tushunishadi”, – Jo Bayden.

AQSh prezidenti Jo Bayden qurol-yarog‘ savdosi va soliq qonunbuzarliklari bilan bog‘liq jinoyatlari uchun hukm qilingan o‘g‘li Hanter Baydenni afv etdi. Bu haqda Oq uy rahbarining bayonotida ma’lumot berildi.

Shuningdek, men o‘g‘lim Hanterni afv etish to‘g‘risidagi farmonni imzoladim. Lavozimni egallaganimdan beri Adliya vazirligining qarorlariga aralashmasligimni aytgan edim va o‘g‘limning adolatsiz ravishda sud tartibida ta’qib qilinayotganini kuzatganimda ham so‘zimda turdim, deyiladi bayonotda.

Bayden o‘g‘lining ta’qib qilinishi aynan ularning qarindoshlik aloqalari va davlat rahbarining siyosiy raqiblari bosimi bilan bog‘liqligini ta’kidladi. Uning fikricha, sud jarayoni qo‘pol siyosat ta’siriga uchragan.

AQShning saylangan prezidenti Donald Tramp Hanterning afv etilishini “mansab vakolatini suiiste’mol qilish” va “adolatni poymol etish” deb atagan.

“Jo Hanterga berilgan afv bir necha yildan beri qamoqda o‘tirgan 6-yanvardagi “garovga olinganlar”ni ham o‘z ichiga oladimi? Bu adolatni suiiste’mol qilish va buzish”, – degan Tramp Truth Social ijtimoiy tarmog‘idagi sahifasida.

Eslatib o‘tamiz, “6-yanvar garovga olinganlar” deganda, Tramp 2021-yil 6-yanvarda Kapitoliyga bostirib kirgan tarafdorlarini nazarda tutgan.

• Bayden
• Tramp