Endilikda Navro‘z bayrami kunlarida ham eski namunadagi haydovchilik guvohnomalarini yangisiga almashtirish mumkin. Bu haqda Adliya vazirligi axborot xizmati ma’lum qildi.

Qayd etilishicha, 2023-yil 31-mart kuni eski guvohnomalarni almashtirishning birinchi bosqichi yakunlanishi, 2010-yilgacha berilgan eski “prava”lar haqiqiy emas deb hisoblanishi va belgilangan muddatda hujjatini almashtirmaganlar sonining ko‘pligini hisobga olgan holda 18, 19, 20 hamda 22-mart kunlari DXM hamda IIBB Yo‘l harakati xavfsizligi boshqarmasi bo‘limlari tomonidan eski namunadagi haydovchilik guvohnomasini yangi namunadagisiga almashtirish imkoni yaratilgan.

Buning uchun ish grafigi mehnat qonunchiligi doirasida qayta ko‘rib chiqildi.

Bunda, yuqorida qayd etilgan kunlarda DXMlar hamda IIBB YHXB bo‘limlari orqali haydovchilarimiz ertalab soat 9:00 dan kechgi soat 18:00 gacha xizmatdan foydalanishlari mumkin.

Eslatib o‘tish mumkin, eski namunadagi “prava”ni yangisiga almashtirish uchun nafaqat DXMlarga yoki IIBB YHXB murojaat qilish, balki uydan turib Yagona interaktiv davlat xizmatlari portali buyurtma berish mumkin.

Joriy yil fevraldan boshlab hozirgi kunga qadar 5 500 dan ortiq fuqaro ushbu taklif etilayotgan tartibdan foydalangan holda eski namunadagi haydovchilik guvohnomalarini yangisiga almashtirgan (pochta orqali uylariga yetkazib berilgan).

Ma’lumot uchun:

Bugungi kunga kelib 2010-yilgacha berilgan guvohnomalarni yangisiga almashtirish lozim bo‘lganlar soni 200 ming nafardan,

2010–2012-yillarda berilgan guvohnomalarni yangisiga almashtirish lozim bo‘lganlar soni 100 ming nafardan,

2013–2015-yillarda berilgan guvohnomalarni yangisiga almashtirish lozim bo‘lganlar soni 150 ming nafardan,

2015 yildan keyin berilgan guvohnomalarni yangisiga almashtirish lozim bo‘lganlar soni 150 ming nafardan ortiqni tashkil qilmoqda.

Joriy yilda 600 mingdan ortiq eski namunadagi haydovchilik guvohnomalari yangi namunadagisiga almashtirilishi lozim.

• DXM
• Haydovchilik guvoxnomasi
• IIB
• YHXB