Toshkent viloyatining Parkent tumanida elektrlashtirilgan temir yo‘l liniyasining qurilishi boshlanishiga bag‘ishlangan tadbir bo‘lib o‘tdi.

Loyiha bo‘yicha “Baytqo‘rg‘on – Parkent” elektrlashtirilgan temir yo‘li umumiy uzunligi 23,8 kilometrdan iborat bo‘ladi. Yangi yo‘nalishni loyihalash ishlari “Boshtransloyiha” aksiyadorlik jamiyati, qurilish ishlari esa temiryo‘lchi mutaxassislar tomonidan amalga oshiriladi.

Loyiha doirasida 2 ta ajratish punkti, 4 ta ko‘prik, 2 ta yo‘l o‘tkazgich, 1 ta tunnel turidagi yo‘l o‘tkazgich, 78 ta suv o‘tkazish inshooti, 7 ta avtomobil yo‘li va temir yo‘li kesishmasi qurilishi rejalashtirilgan.

“Ushbu yangi loyiha yakuniga yetib, foydalanishga topshirilgach Parkent tumanining tog‘li so‘lim go‘shalariga tashrif buyuruvchilar, ayniqsa, sayyohlar oqimi sezilarli darajada ortishiga zamin yaratiladi”, – deya yozmoqda “O‘zbekiston temir yo‘llari” AJ matbuot xizmati.

• Loyiha
• O‘zbekiston temir yo‘llari
• Toshkent viloyati
• elektropoyezd