“Microsoft” asoschisi Bill Geyts o‘zining deyarli butun boyligini xayriya ishlariga berishni rejalashtirayotganini aytdi. Bu haqda u o‘zining Twitter’ida yozgan.

“Men boyligimning deyarli barchasini fondga berishni rejalashtiryapman. Men pastga tushaman va oxir-oqibat dunyodagi eng boy odamlar ro‘yxatidan chiqaman”, – deydi milliarder o‘z murojaatida.

Qayd etilishicha, uning boyligi o‘zining xayriya jamg‘armasi Geyts fondiga o‘tadi. Yaqin oyda u jamg‘arma faoliyati ko‘lamini kengaytirish uchun unga 20 milliard AQSh dollari miqdoridagi pullarni o‘tkazadi.

“Men o‘z resurslarimni jamiyatga azob-uqubatlarni kamaytirish va hayotni yaxshilashga eng katta ta’sir ko‘rsatadigan usullar bilan bermoqchiman. Umid qilamanki, juda boy va imtiyozli lavozimdagi qolgan odamlar ham shu daqiqadan, ushbu masalada peshqadamlikka o‘tishadi”,– deydi Geyts.

Shuningdek, “Microsoft” asoschisi, jamg‘arma Bill va Melinda Geytslarning nomlariga ega bo‘lsa-da, uning mablag‘larining yarmi investor Uorren Baffet tomonidan taqdim etilganini ta’kidlagan.

“Men uning do‘stligi va yetakchiligini qanchalik qadrlashimni hech qachon yetarli darajada ifoda eta olmayman”, deb yozgan Geyts.

Ma’lumot uchun, Bill va Melinda Geyts jamg‘armasi 2000-yilda “Microsoft” asoschisi tomonidan tashkil etilgan. U Qo‘shma Shtatlardagi eng yirik xususiy fond hisoblanadi, uning aktivlari 50,7 milliard dollarga baholanadi.

Jamg‘armaning asosiy faoliyati sog‘liqni saqlash tizimini takomillashtirish, shuningdek, uchinchi dunyo mamlakatlarida ocharchilikni bartaraf etishdan iborat. Bundan tashqari, u OIV / OITS, sil, bezgakning oldini olish va davolash bilan shug‘ullanadi va Afrika va Hindistonda bolalarni emlash bo‘yicha loyihalarni boshqaradi.

AQShda esa Geyts jamg‘armasi ta’lim tizimini qo‘llab-quvvatlash va takomillashtirishga bag‘ishlangan.

• Bill Geyts
• Dunyo
• Xayriya
• milliarderlar