“One Million Uzbek Coders” (“Bir million o‘zbek dasturchilari”) bitiruvchilari uchun kompyuter sotib olishga foizsiz kreditlar, beriladi bu haqda my.gov.uz yagona interaktiv davlat xizmatlari portali xabar bermoqda.

“Bir million o‘zbek dasturchilari” kurslarni tugatib sertifikat olgan yoshlarga “Aloqabank”, “Mikrokreditbank” va “Xalq banki” tomonidan kompyuter xaridlari uchun BHMning 25 baravaridan yuqori bo‘lmagan miqdorda (6 mln. 750 ming so‘m) iste’mol kreditlari ajratilishi ko‘zda tutilgan.

Mazkur kreditlar 2 yilgacha berilib, uning foizi Yoshlar ishlari agentligi tomonidan kompensatsiya qilinadi. Asosiy qarzni kredit oluvchining o‘zi to‘laydi (bu 1 oyga taxminan 281 250 so‘mdan tushadi).

Kredit olish uchun “One Million Uzbek Coders” bitiruvchisi kompyuter sotuvchi do‘kon topib, uni sotib olish bo‘yicha shartnoma tuzishi kerak.

So‘ngra, kredit kompensatsiyasini olish uchun ushbu havola orqali onlayn ariza yuborishi talab etiladi.

Yoshlar ishlari agentligi kredit kompensatsiyasi to‘g‘risida ma’lumotnoma yuborganidan keyin, bank bitiruvchining kredit olish to‘g‘risidagi arizasini ko‘rib chiqib, shartlarga to‘g‘ri kelsa, texnika sotuvchisining hisob raqamiga mablag‘larni o‘tkazadi.

Ma’lumot uchun, BHM (bazaviy hisoblash miqdori) – 270 000 so‘mni tashkil qilmoqda.

• Dasturchi
• Kredit