Qirg‘iziston Milliy xavfsizlik davlat qo‘mitasi O‘zbekiston bilan chegarada yana bir yashirin tunnelni aniqladi. Uning chuqurligi 13 metr, uzunligi 170 metrga yaqin

Bu bir oy ichida ikki davlat chegarasida aniqlangan uchinchi yashirin yer osti yo‘li hisoblanadi. Bu safar tunnelga tushish yo‘li Qorasuv shahrida joylashgan xonadonlarning birida joylashgan.

Xabarda aytilishicha, xonadon egasi qirg‘izistonlik M.I. o‘tgan yilning sentyabr oyida Rustam ismli shaxs bilan ikki davlat chegarasi o‘rtasida yashirin yer osti yo‘li qurishga kelishgan.

Ular tunnel orqali Qirg‘izistondan O‘zbekistonga valyuta va turli mahsulotlarni olib o‘tishni rejalashtirganlar.

Fuqaro M.I. o‘z aybiga iqror bo‘lgan va mazkur holat bo‘yicha olib borilayotgan tergov ishlarida organ xodimlariga yaqindan ko‘mak berishga tayyorligini bildirgan.

Hozirda holat yuzasidan mamlakat Milliy xavfsizlik davlat qo‘mitasi tomonidan tergov-surishtiruv ishlari olib borilmoqda.

Eslatib o‘tamiz, avvalroq Qirg‘iziston va O‘zbekiston chegarasida 270 metrli hamda 155 metrli yer osti tunnellari topilgani xabar qilingan edi.

• Chegara
• O‘zbekiston
• Qirg‘iziston
• Tunnel