Jahon sogʻliqni saqlash tashkiloti koronavirus bilan bogʻliq epidemiologik vaziyat yuzasidan oylik hisobotini eʼlon qildi.

Unda, 2022-yil 26-dekabrdan joriy yil 22-yanvargacha boʻlgan muddatda Yer yuzi boʻyicha COVID-19 ni yuqtirish holatlari va infeksiyadan oʻlim koʻrsatkichlari tahlil etilgan.

Maʼlum qilinishicha, oʻtgan 4 hafta davomida 11 million nafardan ortiq kishiga ushbu kasallik tashxisi qoʻyilgan. Ulardan 55 mingdan ziyodi virus oqibatida vafot etgan.

JSST tahliliga koʻra, 28 kun davomida xastalanish statistikasi undan avvalgi oyga nisbatan 25 foizga kamaygan boʻlsa-da, bu davrda oʻlim koʻrsatkichlari 13 foizga oshgani xavotirli holat. Shu bois tashkilot Yer yuzi aholisiga buster dozada emlanishni tavsiya qilmoqda.

26-dekabrdan 22-yanvargacha eng koʻp bemorlar aniqlangan mamlakatlar:

Yaponiya — 672 526,

AQSh— 323 721,

Janubiy Koreya — 192 638,

Xitoy —142 066,

Braziliya —114 916.

Qayd etish mumkin, pandemiya boshlanganidan buyon dunyo boʻyicha qariyb 665 million kishi koronavirus infeksiyasiga chalingan. Ulardan 6,7 million nafardan ziyodi kasallik oqibatida vafot etgan.

• JSST
• O'lim
• koronavirus