Shri-Lanka bosh vaziri Ranil Vikramasinge og‘ir iqtisodiy inqiroz sharoitida mamlakatda oziq-ovqat tanqisligi yuzaga kelishi mumkinligi haqida ogohlantirdi. Shuningdek, u hukumat oziq-ovqat xavfsizligini ta’minlashga harakat qilayotganini ta’kidlagan. 

Shuningdek, bosh vazir AQShning Shri-Lanka va Afg‘oniston global oziq-ovqat inqirozidan qattiq zarar ko‘rishi haqidagi prognozini keltirib o‘tgan. 

Unga ko‘ra, mamlakat Qishloq xo‘jaligi vazirligi zarur qishloq xo‘jaligi ekinlarini yetishtirish hajmini oshirish dasturini amalga oshiradi. Xususan, Bosh vazir parlamentning barcha a’zolarini ushbu dasturni amalga oshirish va yaqinlashib kelayotgan oziq-ovqat tanqisligi muammosini hal qilish uchun birlashishga chaqirdi.

“Men barchani mamlakatdagi mavjud vaziyat jiddiyligini tan olishga chaqiraman”, - deya qo‘shimcha qildi Vikramasinge.

Qayd etish joiz, Shri-Lankada hozirda benzin tugab bormoqda, shuningdek, boshqa yoqilg‘i turlari, import qilinadigan oziq-ovqat va dori-darmonlar yetishmaydi.

Ma’lumot uchun, Shri-Lankada norozilik namoyishlari bir necha oydan beri davom etmoqda. So‘nggi kunlarda ular bilan tartibsizliklar va o‘t qo‘yishlar kuzatilgan. Ma’lumotlarga ko‘ra, yong‘in oqibatida sakkiz kishi halok bo‘lgan, 200 dan ortiq kishi esa jarohatlangan. 

• AQSh
• Jahon
• Shri-Lanka
• oziq-ovqat