Bugun, 15-yanvar kuni Belarus rahbari Aleksandr Lukashenko Minsk yaqinidagi harbiy aerodromda Qozog‘istondagi harbiy missiyasini yakunlab qaytgan mamlakat qurolli kuchlari bilan uchrashib, ushbu harbiy harakatlar haqida o‘z fikrlarini bildirib o‘tdi.

– “Bundan 80 yil muqaddam Brest qal’asida sovet fuqarolari qo‘lni-qo‘lga berib umumiy Vatanimizni qanday himoya qilishganini bir eslang. Bugun ham xuddi shunday qardosh xalqlar bilan yelkama-yelka turib, bosqinchiga qarshi turamiz”, – dedi Belarus prezidenti KXShT kuchlari bilan uchrashuv vaqtida.

Shuningdek, u Qozog‘istonda ro‘y bergan norozilik namoyishlari nafaqat bu yerning o‘ziga, balki postsovet davlatlarining barchasiga birdek ta’sir ko‘rsatishini, bu kabi namoyishlar o‘zining asosiy ittifoqchisi bo‘lgan Rossiyaning siyosiy pozitsiyasiga putur yetkazish uchun qilingan navbatdagi urinish ekanini qo‘shimcha qildi.

Eslatib o‘tamiz, Lukashenko kuni kecha KXShT’ga a’zo davlatlar rahbarlari o‘rtasidagi videomuloqot vaqtida O‘zbekiston haqida bildirgan fikrlari uchun keskin tanqidlarga uchragan, shuningdek, Shavkat Mirziyoyevdan munosib javob olgandi.

• Belarus
• KXShT
• Prezident
• Qozog‘iston