Ayni vaqtda Administratsiya rahbari raisligidagi Respublika shtabi yigʻilishi davom etmoqda. Sardor Umrzoqov sohadagi kamchiliklarni jiddiy tanqid ostiga olyapti.

“Bizga kelgan maʼlumotlarga koʻra, “Oʻztransgaz”ga qarashli kompressor stansiyalarida ham jiddiy kamchiliklar mavjud. Jami 37 ta agregatdan 21 tasi taʼmirtalab.

Joʻrabek Tursunpoʻlatovich (energetika vaziri), Bekzod Raxmatullayevich (“Oʻztransgaz” rahbari) barcha agregatlar zudlik bilan ishchi holatiga keltirilishi zarur. Nosoz agregatlar boshqa qurilmalar zoʻriqish bilan ishlashiga olib kelib, texnik nosozliklar kelib chiqishiga va isteʼmolchilarni barqaror tabiiy gaz bilan taʼminlash imkonini yoʻqqa chiqaradi” – dedi Umrzoqov.

Administratsiya rahbari aholining eʼtiroziga sabab boʻlayotgan masalalarga ham alohida toʻxtalib oʻtdi.

“Hududlarda yoʻl qoʻyilgan cheklov va yuz bergan avariyalar oqibatida elektr energiyasining uzilishi aholining eʼtiroziga sabab boʻlmoqda.

Masalan, Buxoro, Navoiy, Fargʻona va Toshkent shahrida 1485 ta mahalla kunning maʼlum bir vaqtida elektr taʼminotisiz qolgan.

Ulugʻbek Mavlanovich (“Oʻzbekenergo” AJ raisi), respublika hududlarida avariyalarni bartaraf qilish boʻyicha brigadalar sonini koʻpaytirish va avariyalarni toʻliq bartaraf etish choralarini koʻrsin”, – dedi Administratsiya rahbari.

• Elektr energiyasi
• Gaz
• Prezident Administratsiyasi
• Sardor Umrzaqov