Biznes-trener Islom Ibrohimov qidiruvga berilgani ma’lum bo‘ldi. Bu haqda IIV rasmiy saytining qidiruvdagi shaxslar bo‘limida e’lon qilingan. 

E’londa ma’lum bo‘lishicha, Ibrohimov Islom Jinoyat kodeksining 168-moddasi 4-qismi “a” bandida ko‘rsatilgan jinoyatni (firibgarlik, juda ko‘p miqdorda) sodir etganlikda gumonlanib, qidiruvga berilgan.

Jinoyat kodeksida ushbu turdagi jinoyat uchun bazaviy hisoblash miqdorining 400 baravaridan 600 baravarigacha (132 mln so‘mdan 198 mln so‘mgacha) miqdorda jarima yoki 8 yildan 10 yilgacha ozodlikdan mahrum qilish jazosi tayinlanishi belgilangan.

Islom Ibrohimov asosan biznesda muvaffaqiyatga erishish, boy bo‘lish haqidagi treninglari bilan tanilgan. Ma’lum bir to‘lov evaziga turli viloyatlarda ushbu turdagi treninglar o‘tkazib kelgan. 

U yaqinda o‘zining telegram kanaliga Kanadada tushgan suratlarini ham joylashtirgan.

• Biznes
• IIV
• JK