Vazirlar Mahkamasining 2021-yil 27-yanvardagi “Aholi va tadbirkorlik subyektlarining davlat xizmatlaridan foydalanish imkoniyatlari kengaytirilishi munosabati bilan O‘zbekiston Respublikasi Hukumatining ayrim qarorlariga o‘zgartirish va qo‘shimchalar kiritish, shuningdek, ba’zilarini o‘z kuchini yo‘qotgan deb hisoblash to‘g‘risida”gi qarori qabul qilingan.

Ushbu hujjat bilan Hukumatning qarorlariga quyidagi o`zgartirish va qo`shimchalar kiritildi:

- birinchidan, O‘zbekiston Respublikasida soliq to‘lovchilarning identifikatsiya raqamlarini berish va qo‘llash tizimi to‘g‘risida nizomning (Vazirlar Mahkamasining 1997-yil 11-martdagi 130-son qarori bilan tasdiqlangan) 5-bandi yangi tahrirda belgilangan bo‘lib, unga muvofiq jismoniy shaxsni davlat soliq xizmati organlarida soliq to`lovchi sifatida hisobga qo‘yish jismoniy shaxsning shaxsiy identifikatsiya raqami orqali amalga oshiriladi.

- Ikkinchidan, Advokatlik faoliyatini litsenziyalash to‘g‘risida nizomga (Vazirlar Mahkamasining 2009-yil 9-martdagi 60-son qarori bilan tasdiqlangan) quyidagi o‘zgartirishlar kiritildi:

- litsenziya talabgorining arizasini ko‘rib chiqish muddati qisqartirildi. Ilgari bu muddat 20 kun bo‘lgan bo‘lsa, hozir esa 10 ish kunini tashkil qiladi.

- adliya organi tomonidan litsenziyani qayta rasmiylashtirish va dublikat berish muddati qisqartirildi. Avvalgi tahrirda bu muddat 3 kunni tashkil etgan bo‘lsa, yangi tahrirda 2 ish kuni belgilangan.

- har xil yig‘imlar bekor qilindi. Yangi tahrirda litsenziya berish to‘g‘risidagi arizaning adliya organi tomonidan ko‘rib chiqilishi, shuningdek litsenziyaning dublikati berilganligi uchun yig‘imlar nazarda tutilmagan.

Uchinchidan, Tadbirkorlik subyektlarini davlat ro‘yxatidan o‘tkazish tartibi to‘g‘risidagi nizomga o‘zgartirishlar kiritildi. Jumladan, Nizomning 48-bandi ariza beruvchilar qayta ro‘yxatdan o‘tkazish rad etilgan kundan boshlab besh ish kuni ichida davlat boji to‘lamagan holda qayta ro‘yxatdan o‘tish uchun ariza berish huquqiga ega ekanligi haqidagi band bilan to‘ldirilgan. Shuningdek, ro‘yxatga olish guvohnomasini berish uchun BHMning 10% undirilishi qayd etilgan.

Hujjat Qonun hujjatlari ma’lumotlari milliy bazasida e’lon qilingan va joriy yil 27-dekabrdan kuchga kirgan.

• Qaror
• Vazirlik