O‘zbekiston iqlim o‘zgarishi muammosining jiddiyligini tan oladi. Shu sabab 2030-yilga borib yashil energiya ishlab chiqarishni 40 foizga yetkazish rejalashtirilgan. Bu haqda Energetika vazirining o‘rinbosari Umid Mamadaminov Ozarbayjonning Baku shahrida bo‘lib o‘tgan COP29 doirasidagi Markaziy Osiyoda energiyaga o‘tish bo‘yicha investitsiya forumida ma’lum qilgan.

Vazirlik rasmiysining ta’kidlashicha, O‘zbekiston ham energiya talab qiladigan mamlakat bo‘lib, chiqindilarning 70 foizi energetika sohasiga to‘g‘ri keladi. “Biz iqlim o‘zgarishi muammosining chuqurligini tushunamiz. So‘nggi bir necha yil ichida O‘zbekiston uglerod izini kamaytirish va barqaror rivojlanish maqsadlarini amalga oshirish uchun qayta tiklanadigan energiyani energiya tizimiga integratsiya qilishga intilmoqda. 2030-yilga kelib mamlakatda qayta tiklanadigan manbalardan ishlab chiqariladigan elektr energiyasining ulushi kamida 40 foizni tashkil etadi. Shunday qilib, bu bizning asosiy maqsadimiz - qayta tiklanadigan manbalardan elektr energiyasini ishlab chiqarishni ko‘paytirish”, – deya ta’kidladi Mamadaminov.

Vazir o‘rinbosari toza energiyaga o‘tishda chegaradosh davlatlar bilan transchegaraviy aloqalarni kengaytirish bo‘yicha hamkorlik qilish muhimligini qo‘shimcha qilgan.

“Hozirda ko‘plab gidroenergetika loyihalari amalga oshirilmoqda, biz Qirg‘iziston va Qozog‘iston, shuningdek, Tojikiston bilan hamkorlikda ish boshladik”, – deydi vazir o‘rinbosari.

Mamadaminovning aytishicha, hozirda barcha Markaziy Osiyo davlatlari uglerod bozori bo‘yicha o‘z strategiyasini ishlab chiqmoqda. O‘zbekistonda ham bu boradagi me’yoriy-huquqiy baza ishlab chiqilmoqda va 2024 yilning oxirigacha tayyor bo‘ladi.

Shuningdek, u iqlim bo‘yicha maqsadlarga erishish uchun moliya institutlarining hamkorligi va xalqaro hamjamiyatning yordami zarurligini ta’kidlab o‘tgan.

• Ekologiya