BMT Bosh kotibi Antoniu Guterrish Liviyadagi tomonlarni zo‘ravonlik harakatlaridan tiyilishga, xavfsizlik kuchlarini esa maksimal darajada vazminlik koʻrsatishga chaqirdi. Bu haqda BMT bosh kotibi vakili Stefan Dyujarrik bayonot berdi.

“Bosh kotib Liviyaning koʻplab shaharlarida, jumladan, Tripoli, Tobruk va Bingʻozida uyushtirilgan norozilik namoyishlarini xavotir bilan kuzatib bormoqda”, — deyiladi bayonotda.

Guterrish barcha namoyishchilarni zoʻravonlik harakatlaridan tiyilishga va xavfsizlik kuchlarini maksimal darajada vazminlikka chaqirdi.

“Bosh kotib Liviyadagi tomonlarni barqarorlikka putur yetkazadigan har qanday harakatlardan tiyilishga chaqiradi”, — deyiladi bayonotda.

Ma‘lumot uchun, joriy yilning, 1-iyul kuni Liviyaning qator shaharlarida norozilik namoyishlari bo‘lib o‘tdi. Liviya poytaxti Tripoli aholisi ko‘chalarga chiqib, hokimiyatni tarqatib yuborish, mamlakatda favqulodda holat e’lon qilish, elektr ta’minotidagi inqirozni bartaraf etish, prezidentlik va parlament saylovlarini tezlashtirishni talab qildi. Shu kuni namoyishchilar Tobruk shahridagi parlament vakillar palatasi binosiga bostirib kirishdi . Namoyishchilar ofislar, qabulxonalar va mehmon uylarini yoqib yuborgan, hujjatlarni yo‘q qilgan.

• BMT
• Liviya
• qo'zg'olon