BMTning Jahon oziq-ovqat dasturi (WFP) Ilon Maskning so‘roviga ko‘ra, 6,6 milliard AQSh dollari dunyo bo‘yicha ochlikka qarshi kurashda qanday sarflanishi rejasini ochiqladi. Bu haqda Twitter'da dasturning ijrochi direktori Devid Bizli yozgan. 

Bizli CNN telekanalida uzatilgan ko‘rsatuvda milliarderlarga murojaat qilib, 42 million kishini ochlikdan saqlab qolishda qatnashishni so‘ragandi. U o‘shanda Mask va Amazon'ning asoschisi Jeff Bezosni alohida ta’kidlab o‘tgandi. Bundan tashqari, ijrochi direktor summaning 6 milliardligini ham birinchi marta aytgan. 

Bu so‘rovga Ilon Mask Twitter'da javob berdi. "Agar WFP 6 mlrd dunyodagi ochlikni qanday bartaraf etishi mumkinligini Twitter'da ochiqlasa, shu zahoti Tesla'ning aksiyalarini sotib, pul ajrataman" – dedi u o‘z sahifasida. 

WFP hisobi bo‘yicha eng katta mablag‘ Yamandagi ochlarga ajratiladi. Ikkinchi o‘rinda Janubiy Sudan, asosiy o‘ntalik ichida Afg‘oniston, Venesuela, Pokiston va Suriya kabi mamlakatlar bor.

• BMT
• milliarderlar