Davlat bojxona qoʻmitasining maʼlum qilishicha, xorijdan bojxona postiga keltirilgan 2 ta yuk konteyneri belgilangan tartibda bojxona koʻrigidan oʻtkazilgan.

Toshkent shahar bojxona boshqarmasi “Chuqursoy texnik idorasi” temir yoʻl chegara bojxona posti xodimlari tomonidan xorijdan bojxona postiga keltirilgan 2 ta yuk konteyneri tovarlarga tegishli yuk hujjatlari va inspeksion koʻrik majmuasidan olingan rengent tasvirlari oʻrtasida oʻzaro nomuvofiqliklar aniqlanganligi sababli belgilangan tartibda bojxona koʻrigidan oʻtkazilgan.

Bojxona koʻrigi davomida hujjatlarda “gaz plitalar korpusi” deya koʻrsatilgan tovarlar aslida tayyor shakldagi stol usti gaz plitalari ekanligi, shuningdek hujjatlarda koʻrsatilganidan ortiqcha boʻlgan elektromotorlar borligi aniqlangan.

Natijada, dastlabki qiymati 1 mlrd. 181 mln. soʻmlik 2 491 dona tayyor shakldagi stol usti gaz plitalari hamda 15 840 dona elektromotorlar vaqtincha saqlovga olingan. Taʼkidlanishicha, hozirda mazkur holat yuzasidan surishtiruv harakatlari olib borilmoqda.

• Bojxona