Toshkent shahar bojxona boshqarmasi Kontrabandaga qarshi kurashish va bojxona auditi boʻlimi xodimlari tomonidan Milliy Gvardiya Toshkent shahar boshqarmasi xodimlari bilan hamkorlikda Chilonzor tumani hududida pirotexnika vositalarining noqonuniy aylanuvini fosh etishga qaratilgan tezkor tadbir oʻtkazilgan.

Tezkor tadbir davomida, Toshkent shahridagi savdo majmualarining birining yaqinida fuqaro N.X “Isuzu” rusumli transport vositasidan karton korobkalarga joylangan pirotexnika vositalarini olib, oʻzining boshqaruvidagi “Lacetti” rusumli transport vositasiga ortayotgan vaqtida tezkor xodimlar tomonidan toʻxtatilib, mazkur transport vositalari belgilangan tartibda koʻzdan kechirilgan.  

Natijada, transport vositalarida xorijda ishlab chiqarilgan va bojxona rasmiylashtiruvidan oʻtganligini tasdiqlovchi hujjatlari boʻlmagan qiymati 259 mln. 200 ming soʻmlik 8 640 qutida jami 518 400 dona “britanik” nomli pirotexnika vositalari borligi aniqlanib, ashyoviy dalil sifatida rasmiylashtirilib olingan.

Maʼlum qilinishicha, hozirda mazkur holat yuzasidan bojxona organlari tomonidan surishtiruv harakatlari olib borilmoqda.

• Bojxona
• Pirotexnika