Oliy Majlis Senati yalpi majlisida bola huquqlari kafolatlarini taʼminlash mamlakatimizda ustuvor vazifalardan biri ekaniga eʼtibor qaratildi.

“Bola huquqlarining kafolatlarini taʼminlash tizimi yanada takomillashtirilishi munosabati bilan Oʻzbekiston Respublikasining ayrim qonun hujjatlariga oʻzgartish va qoʻshimchalar kiritish toʻgʻrisida”gi Oʻzbekiston Respublikasi qonunini muhokama qilish jarayonida bolalar huquqlari, erkinliklari va qonuniy manfaatlarini ishonchli himoya qilishning institutsional va huquqiy asoslari tubdan takomillashtirilgani qayd etildi.

Keltirilishicha, jinoyat qonunchiligida voyaga yetmaganlarga nisbatan insonparvarlikni kuchaytirish maqsadida jinoiy javobgarlikka tortish yoshini oʻn uch yoshdan oʻn toʻrt yosh etib belgilanmoqda. Voyaga yetmaganlarning jinsiy erkinligiga qarshi jinoyatlar, shu jumladan bolalarga nisbatan uyatsiz-buzuq harakatlar uchun belgilangan jazo choralari kuchaytirilmoqda.

Shuningdek, voyaga yetmagan jabrlanuvchi yoki guvohni soʻroq qilish muddatlari aniq belgilanib, jinoyat-protsessual qonunchilikda voyaga yetmagan jabrlanuvchi, guvoh, gumon qilinuvchi yoki ayblanuvchini soʻroq qilishda psixolog ishtirok etishini taʼminlash nazarda tutilmoqda.

Qonun boʻyicha oʻz fikrini bildirgan Senat raisi Tanzila Norboyeva bolalar manfaatlarini taʼminlash boʻyicha aniq choralar amalga oshirilgani, qonunchilik mustahkamlanib, tashkiliy, institutsional asoslar shakllantirilgan, bolalar mehnatiga barham berilib, Bolalar ombudsmani tashkil etilgani bolalar manfaatini taʼminlashda muhim ahamiyat kasb etayotgani haqida gapirdi.  

Aytilishicha, bu borada erishilgan natijalar qoʻllab-quvvatlanishi barobarida, xalqaro miqyosda ham eʼtirof etilmoqda. Ushbu yoʻnalishdagi tizimli ishlar bundan keyin ham izchil davom ettiriladi. Senat raisi bola huquqlarini taʼminlashda qonun normalarini qatʼiylashtirishning oʻzi kifoya qilmasligini alohida taʼkidladi. 

“Mazkur masalada jamiyat faolligi va masʼuliyati nihoyatda muhim. Zero, bir bolaga yetti mahalla ota-ona, degan naql bekorga aytilmagan”, — dedi Tanzila Norboyeva.

• Qonun
• Senat