Bosh prokuratura xodimi Samir Rahmonovning 2021-yil 26-martda ish vaqtida ish joyida vafot etgani bo‘yicha Bandlik va mehnat munosabatlari vazirligining Davlat mehnat inspeksiyasi tomonidan izoh berildi.

Vazirlik Matbuot xizmatining ta’kidlashicha, ish joyida vafot etishga oid masalalar Hukumatning 286-sonli qarori bilan tasdiqlangan Nizomga muvofiq amalga oshiriladi.

Unga ko‘ra, tashkilot hududida va uning tashqarisida xodimning mehnat vazifalarini bajarayotganda yuz bergan jarohatlanishi yoki salomatlikning boshqa xil shikastlanishi mehnat faoliyati bilan bog‘liq ravishda sodir bo‘lgan baxtsiz hodisalar hisoblanadi.

Shuningdek, tabiiy o‘lim, o‘zini o‘zi o‘ldirish, jabrlanuvchining o‘z salomatligiga qasddan shikast yetkazishi, jabrlanuvchining jinoyat sodir qilish chog‘ida shikastlanishi holatlari (sud-tibbiy ekspertiza xulosasi yoki tergov organlarining ma’lumotlariga ko‘ra) tekshirilmasligi va hisobga olinmasligi belgilangan.

Davlat mehnat inspeksiyasi mazkur Nizomga muvofiq oqibati o‘lim bilan tugagan hodisa to‘g‘risida ish beruvchining majburiyatlari qanday bo‘lishi kerakligini ham ma’lum qilgan.

Unga ko‘ra, bunday hollarda ish beruvchi:
–  Bandlik va mehnat munosabatlari vazirligiga, Toshkent shahar Bandlik bosh boshqarmasiga;
–  baxtsiz hodisa yuz bergan joydagi hududiy ichki ishlar organiga;
–  ish beruvchining fuqarolik javobgarligini majburiy sug‘urta qilish shartnomasi bo‘yicha sug‘urtalovchiga darhol xabar berishi kerak.

“Tibbiy xulosaga asosan Bandlik va mehnat munosabatlari va vazirligiga, Toshkent shahar Bandlik bosh boshqarmasiga mazkur holat bo‘yicha xabar berilmagan.
Toshkent shahar sudi matbuot xizmati marhumning otasi sudga murojaat qilganligini ma’lum qilgan. Sudning 17-sentyabrdagi hal qiluv qarori bilan da’vogar A.Raxmanovning da’vosi rad qilingan”, – deyiladi inspeksiya xabarida.

Shuningdek, Davlat mehnat inspeksiyasi sud qaroridan keyin Inspeksiya vakolatiga kiradigan masalalar yuzasidan qo‘shimcha xulosalar, tushunchalar berilmasligini bayon qilgan.

Eslatib o‘tamiz, bir muddat oldin sobiq prokuratura xodimi Samir Rahmonovning otasi Bosh prokuraturani o‘g‘lining o‘limi uchun tovon to‘lamayotganlikda ayblab sudga bergani aytilgan edi.

Samir Rahmonov joriy yil 26-aprel kuni ish joyida vafot etgan.

• Bosh prokuratura
• Prokuratura