Braziliya Oliy sudi sobiq prezident Fernando Afonsu Kolor di Meluni korrupsiya va pul yuvishda ayblab, 8 yilu 9 oyga ozodlikdan mahrum qildi.

Avval xabar berganimizdek, 2010 – 2014-yillarda Alagoas shtati senatori bo‘lib ishlagan Kolor di Melu qurilish kompaniyalaridan biri bilan shartnomalar tuzish evaziga Petrobras davlat neft kompaniyasi sho‘ba korxonasidan umumiy qiymati 4 million dollar miqdorida pora olganlikda ayblangan.

Sud hujjatlariga ko‘ra, sobiq davlat rahbari o‘zining siyosiy ta’siridan Petrobras sho‘ba korxonasi Distribuidora direktorlar kengashiga nomzodlarni ilgari surish va shartnomalar uchun sharoit yaratishda foydalangan.

Fernando Afonsu Kolor di Melu 1989-yilda harbiy diktatura tugaganidan keyin demokratik saylovlar orqali saylangan birinchi Braziliya prezidenti bo‘lgan.

90-yillarning boshlarida Kolor di Melu korrupsiyada ayblangan, 1992-yilda Braziliya Kongressi impichment jarayonini boshlagan. Ushbu masala bo‘yicha ovoz berishdan biroz oldin prezident iste’foga chiqdi. Shunga qaramay, ovoz berish bo‘lib o‘tdi, Kolor di Melu esa sakkiz yilga siyosatdan chetlashtirildi.

2006-yilda sobiq prezident Alagoas shtati senatori etib saylangan. U 2015-yilda Braziliya Bosh prokurori tomonidan korrupsiyada ayblangan, biroq 2023-yil fevraligacha senator bo‘lib ishladi.

• Braziliya
• Prezident
• Sud