Buyuk Britaniya qiroli Charlz III shahzoda Garri va Megan Markl o‘zining toj kiyish marosimida qatnashishlarini xohlaydi, ammo valiahd Uilyam bunga qarshi. Bu haqda “Daily Mail” nashri xabar berdi.

Qayd etilishicha, qirol Charlz arxiyepiskop Jastin Uelbidan shahzoda Garri va Megan Marklning marosimda qatnashishi uchun vositachilik qilishni so‘ragan.

Saroydagi yuqori martabali manbalarning nashrga ma’lum qilishicha, Buyuk Britaniya qiroli Sasseks gersoglari uning toj kiyish marosimida qatnashishini xohlaydi, ammo shahzoda Uilyamning qarshiligiga duch keldi. U ukasini vaziyatdan foydalanib, bu muhim voqeada “ko‘zga soya soladigan hiyla-nayranglarni sodir etishidan” qo‘rqadi.

Xabarlarga ko‘ra, qirol Kenterberi arxiyepiskopidan o‘zining janjalkash o‘g‘illari o‘rtasida Garri va Meganga 2023-yil may oyida Buyuk Britaniyaga tashrif buyurishga imkon beradigan kelishuvga vositachilik qilishni so‘ragan.

Insayderning ta’kidlashicha, Charlz III yon berishga tayyor, chunki u Garri va Megan Marklning toj kiyish marosimida ishtirok etishi qirollik oilasi obro‘siga ijobiy ta’sir ko‘rsatishiga ishonadi. Bunday qarorga “Garri va Megan” hujjatli seriali va Sasseks gersogining “Zaxira” xotiralari ortidan yuz bergan bir qator mojarolar sabab bo‘lishi mumkin.

Eslatib o‘tamiz, avvalroq qirollik oilasining do‘sti shahzoda Garri Charlz III’ning toj kiyish marosimiga kelmasligini aytgan edi.

Kenja o‘g‘il – Garrining ismi otasining toj kiyish marosimi uchun tayyorlangan ssenariydan o‘chirib yuborilgani xabar qilingan edi.

Qirol Charlz an’anadan chetga chiqqan holda gersoglarning qirol qarshisida tiz cho‘kib, unga hurmat bajo keltirishidan voz kechadi. Bu rolni faqatgina shahzoda Uilyam bajaradi.

Bunga so‘nggi vaqtlarda shahzoda Garrining shov-shuv ko‘tarish va qirollik oilasi a’zolarini qoralashga harakat qilayotgani sabab sifatida keltirilgan.

Qayd etish mumkin, toj kiyish marosimi 2023-yilning 6-may sanasiga rejalashtirilgan.

• Buyuk Britaniya
• Charlz III
• qirol