Saylovda mamlakatni 1994-yildan beri boshqarib kelayotgan Aleksandr Lukashenko ham o‘z nomzodini qo‘ygan holda qatnashmoqda. Lukashenko bilan qo‘shib hisoblaganda umumiy besh nafar nomzod ishtirok etmoqda.

Ayni dam, mamlakat muxolifati yetakchilarining deyarli barchasi chet elga ketishga majbur bo‘lgan yoki qamoqxonalarda saqlanmoqda. Xorijiy davlatda yashovchi Belarus muxolifati yetakchilaridan biri Svetlana Tixanovskaya saylov jarayonini “soxtalashtirilgan va nodemokratik” deb atagan.

Belarus provayderlari mahalliy vaqt bilan 25-yanvar kuni soat 10:00 dan 27-yanvar soat 23:59 gacha chet davlatlardan virtual hostingga kirishni cheklagan. Bu haqda Belarusdagi eng yirik domen ro‘yxatga oluvchisi va IT infratuzilmasi yetkazib beruvchisi Hoster ma’lum qildi.

Ma’lum qilinishicha, ushbu choralar “axborot infratuzilmasi obyektlari va ular yordamida qayta ishlanadigan ma’lumotlarga tahdid”ning oldini olish bilan bog‘liq.

“Belarusdagi saytlardan aksariyati virtual hostingda joylashgan bo‘lib, shu sababli, saytlarga chet eldan kirish cheklanadi”, — deya tushuntirish bergan Hoster bosh direktori Sergey Pavalisov.

• Belarus
• Lukashenko
• Prezident
• saylov