Polsha poytaxti Varshava shahrida shaxmatning blis va rapid yoʻnalishi boʻyicha FIDE jahon chempionati davom etmoqda.

Umumiy mukofot jamgʻarmasi 1 million dollarni tashkil qiluvchi ushbu nufuzli musobaqada oʻzbekistonlik yosh grossmeysterlar Nodirbek Abdusattorov, Javohir Sindarov, Shamsiddin Vohidov va Jahongir Vohidov ishtirok etishyapti.

Qayd etilishicha, 17 yoshli grossmeysterimiz Nodirbek Abdusattorov 9-turdan soʻng 7 ochko jamgʻargan holda qoʻshimcha koefisentlarga koʻra ikkinchi oʻrinni egallab turibdi.

Nodirbekdan yarim ochko koʻp jamgʻargan amaldagi jahon chempioni, norvegiyalik grossmeyster Magnus Karlsen chempionatda peshqadamlik qilyapti.

Kecha Nodirbek qora donalarda oʻynashiga qaramay, isroillik mashhur grossmeyster Boris Gelfandni magʻlubiyatga uchratdi. Karlsen esa oq donalarda polshalik Yan Dudadan ustun keldi.

Bugun 10-turda Nodirbek Abdusattorov (2 593) oq donalarda Magnus Karlsen (2 842)ga qarshi bahs olib boradi.

Shuningdek, toʻqqizinchi turda Jahongir Vohidov oq donalarda hindistonlik Arjun Yerigaysi bilan durang oʻynadi. Shamsiddin Vohidov qora donalarda polshalik Jimon Gumularzga, Javohir Sindarov esa rossiyalik Mixail Antipovga yutqazib qoʻydi.

• O‘zbekiston
• Shaxmat