Bugun, 14-sentabr kuni Samarqandga BMT Bosh kotibi o‘rinbosari, Eron va Qirg‘iziston prezidentlari hamda Xitoy Xalq Respublikasi Raisi tashrif buyuradi. Bu haqda prezident matbuot kotibi Sherzod Asadov ishtirokida bo‘lib o‘tgan brifingda ma’lum qilingan.

“Xususan, hozirgina ilk mehmonimiz – Mo‘g‘uliston Prezidenti Uxnaagiyn Xurelsux Samarqandga yetib keldi. Shuningdek, ayni daqiqalarda Birlashgan Millatlar Tashkiloti Bosh kotibi o‘rinbosari Rozmari Di Karloning tashrifi kutilmoqda”, – dedi prezident matbuot kotibi.

Shuningdek, bugun Eron Islom Respublikasi Prezidenti Ibrohim Raisiyning rasmiy tashrifi kutilmoqda.

“U Samarqandga tushdan so‘ng yetib keladi, oliy darajadagi muzokaralar bugunning o‘zida bo‘lib o‘tadi. Uchrashuv yakunida savdo, kooperasiya, innovasiyalar, transport, energetika, turizm va boshqa yo‘nalishlarda hujjatlar imzolanishi rejalashtirilgan”, – dedi Sherzod Asadov.

Bugun kunning ikkinchi yarmida Xitoy Xalq Respublikasi Raisi Si Szinpin va Qirg‘iz Respublikasi Prezidenti Sadir Japarov ham Samarqandga yetib keladi.

Qolgan barcha mehmonlar tashrifi ertaga, 15 sentyabr kuni kutilmoqda.

“Bu kuni ko‘plab ikki tomonlama muzokaralar rejalashtirilgan. Kechga yaqin SHHT sammitining norasmiy tadbirlari boshlanadi. Asosiy tadbir esa 16 sentyabr kuni O‘zbekiston Respublikasi Prezidenti Shavkat Mirziyoyev raisligida yangi turizm markazidagi “Kongress-xol”da bo‘lib o‘tadi”, – deya qo‘shimcha qilgan prezident matbuot kotibi.

Asadovning fikricha, Samarqand sammiti dozlarb mintaqaviy va global mavzularga boy kun tartibiga ega bo‘lishi, uning yakunlari bo‘yicha SHHT doirasida ko‘p tomonlama hamkorlikni yanada kuchaytirish imkonini beruvchi muhim, qolaversa, tarixiy ahamiyat kasb etuvchi qarorlar va hujjatlar bo‘lishi kutilmokda. Sammit SHHT o‘zaro bog‘liqlikdagi dunyoda ochiq va keng hamkorlikni ilgari suruvchi, davlatlar o‘rtasida do‘stona, o‘zaro teng huquqli va manfaatli serqirra aloqalarni kengaytirishga xizmat qilayotgan nufuzli tashkilot ekanligini tasdiqlaydi.

• Samarqand
• ShHT
• Sherzod Asadov