Bugun tarmoqlarda rossiyalik yozuvchining O‘zbekiston haqidagi fikrlari tarqaldi va keng muhokamalarga sabab bo‘ldi.

Unga javoban:
“Biz bilan do‘stlik rishtalarini bog‘lab, har tomonlama o‘zaro manfaatli hamkorlik qilib kelayotgan Rossiya Federatsiyasidagi siyosiy partiya – “Справедливая Россия – Патриоты – За правду”ning hamraisi Zaxar Prilepinning urushni targ‘ib qilishga qaratilgan chiqishi qalbimizni larzaga soldi.

Kaykovusning Qobusnoma asarida “Aqlsiz do‘st aqllik dushmandin yomonroqdir” degan naql bor. Bu “do‘st” dunyoning ko‘pgina mamlakatlarida notinchlik yuz berayotgan, qonli mojarolar avj olayotgan, buning natijasida tinch aholi jabr ko‘rayotgan, uy-joyidan, mol-mulkidan ayrilib boshpanasiz, himoyasiz qolayotgan ayni zamonda mamlakatimizda hukm surayotgan tinchlikka raxna solish niyatini bildirdi.

Janob Prilepin shuni yaxshilab o‘qib oling! O‘zbekiston MUSTAQIL, SUVEREN DAVLAT. Uni bosib olishga, unda o‘z hukmini o‘tkazishga, xorijiy til o‘rgatishga hech kimning haqqi yo‘q va bunday surbetlik bilan e’lon qilingan fikrlar na xalqaro huquqqa, na sog‘lom aqlga to‘g‘ri kelmaydi. Aksincha, urushni targ‘ib qilish – bu jinoyatdir.

Shuni g‘urur bilan aytamizki, mamlakatimizda tinchlik-totuvlik hukm surayotgani, bunyodkorlik ishlari izchillik bilan davom etayotgani, iqtisodimiz yuksalayotgani, sportchilarimiz zabt etayotgan shohsupalar, erishayotgan yutuqlarimizning barcha-barchasi mamlakatimiz qudratidan dalolatdir.

Bizning ulug‘ xalqimiz muqaddas huquqimiz – mustaqilligimizni hech kimga, hech qachon berib qo‘ymaydi! Mustaqilligimizni, suverenitetimizni, davlat chegaralarimiz daxlsizligini himoya qilishga kuch-qudratimiz ham, jur’atimiz ham yetarli”– degan deputat Inomjon Qudratov.

• Deputat
• Rossiya