Jahon sog‘liqni saqlash tashkilotining so‘nggi ma’lumotlariga ko‘ra, koronavirusning yangi “omikron” shtammi qayd etilgan mamlakatlar soni 57 taga yetdi. Eng yomoni, bu ko‘rsatkich kun sayin oshib bormoqda.
Xususan, JSST rahbari Tedros Gebreyesusning so‘zlariga ko‘ra, COVID-19’ning yangi mutatsiyasi pandemiyaga qanday ta’sir ko‘rsatishini oldindan aytish qiyin. Ammo yangi shtammning tez sur’atlar bilan tarqalayotgani fakt.
Pandemiyaning yangi to‘lqini, ayniqsa Yevropa mamlakatlarini tang ahvolga solib qo‘ymoqda. Masalan, Fransiyada so‘nggi 24 soat ichida 61,3 mingdan ortiq kishida koronavirus infeksiyasi aniqlangan. Bu o‘tgan yilning 2-noyabridan buyon qayd etilgan eng yuqori ko‘rsatkichdir.
Qayd etilishicha, Buyuk Britaniyada ham ahvol tashvishlanarli. Kasallanish holatlari kun sayin ko‘payib, kecha qariyb 50 ming 600 nafarga yetgan. Hukumat “omikron” shtammi keng tarqalib ketmasligi uchun qo‘shimcha tartib va cheklovlarni joriy etishga majbur bo‘lgan. 
Jumladan, joriy yilning  10-dekabridan Buyuk Britaniyada jamoat joylarida tibbiy niqob taqish majburiy etib belgilandi. Qolaversa, 13-dekabrdan masofaviy ish formatiga o‘tilishi mumkin. 
Boshqa mamlakatlar ham ehtiyot choralarini kuchaytirishga kirishgan. Masalan, Braziliyada “omikron” ro‘yxatga olingach, bu yerda emlanmagan xorijlik sayyohlar uchun besh kunlik karantin joriy etilgan.  
Ma’lumotlarga ko‘ra, olimlar ayni paytda mavjud vaksinalarning yangi shtammga nisbatan samaradorligini o‘rganmoqda. Xususan, Afrika Sog‘liqni saqlash tadqiqot instituti (Janubiy Afrika Respublikasi) ikki hafta davomida 12 nafar emlangan fuqaroning qon tahlillarini tekshirgan.  Ma’lum bo‘lishicha, vaksina olganlarda immunitet nisbatan yaxshi saqlanib qoladi. To‘liq bosqichda emlanganlarda antitanachalar yangi shtammga qarshi faolroq kurashdi.
Shuningdek, 2021-yil 8-dekabr kuni “Pfizer Inc va BioNTech SE” kompaniyalarining ilk laboratoriya tadqiqotlari yakunlari ham e’lon qilindi. Unga ko‘ra, Pfizer vaksinasining uchinchi — buster dozasi antitanachalar miqdorini 25 barobar ko‘taradi va bu “omikron”ni “yengish” uchun kifoya qiladi. 

• JSST
• Vaksina