Buxoro viloyati XTB viloyatda mavjud 169 ming 339 nafar o‘quvchidan jami 914,4 mln. so‘m majburiy yig‘im undirmoqchi bo‘lgani aniqlandi.

Buxoro viloyati prokuraturasi tomonidan o‘tkazilgan tekshiruvda viloyat Xalq ta’limi boshqarmasi tomonidan 2021-2022-o‘quv yili uchun “Yoshlik” jismoniy tarbiya va sport jamiyatiga a’zolikka qabul qilish va a’zolik badallarini yig‘ish to‘g‘risida majburiy xarakterda bo‘lgan 225-sonli buyrug‘i qabul qilinganligi ma’lum bo‘lgan.

Ushbu buyruq ilovasida viloyatdagi jami 169 ming 339 nafar o‘quvchidan 914,4 mln. so‘m va 28 ming 488 nafar pedagog xodimdan 307,6 mln. so‘m a’zolik badallarini yig‘ish reja-grafigi tasdiqlangan.

Viloyat prokuraturasining tekshirishi davomida Xalq ta’limi boshqarmasining 2021-yil 10-dekabrdagi 238-sonli buyrug‘i bilan yuqoridagi buyruq bekor qilindi. Boshqarma boshlig‘i qonun buzilishiga yo‘l qo‘ymaslik haqida rasman ogohlantirildi.

Ma'lumot uchun, a’zolik badallarini to‘lash ixtiyoriy bo‘lib, har qanday majburiy to‘lov undirilishi qonunga muvofiq javobgarlikka sabab bo‘ladi.

• Buxoro
• Prokuratura