Kecha, 14-fevral kuni Respublika shoshilinch tibbiy yordam ilmiy markazi Buxoro filialida poytaxtdan borgan bir guruh transplantolog mutaxassislar hamda mahalliy shifokorlar ishtirokida buyrak koʻchirib oʻtkazish amaliyoti bajarildi. Bu haqda SSV matbuot xizmati xabar berdi.

Maʼlum qilinishcha, sakkiz soat davom etgan murakkab operatsiya natijasida kogonlik 31 yoshli S.Safarovga 62 yoshli otasi X.Safarovning ishlab turgan bir buyragi koʻchirib oʻtkazildi. Hozir har ikki bemorning ham ahvoli yaxshi ekani aytilmoqda.

“Koʻz oldingda jondan aziz farzandingni darddan soʻlib borayotganini koʻrish eng ogʻir sinovdir. Ayniqsa, oʻgʻlimning bir necha yil ushbu kasallikdan azob chekkanini oʻylasam, yuragim ogʻriydi. Nasib boʻlsa, ushbu operatsiyadan keyin farzandim yana sogʻlom hayotga qaytadi. Buning uchun shifokorlardan behad minnatdorman”, – deydi X.Safarov.

Taʼkidlanishicha, mazkur jarrohlik amaliyotiga boshchilik qilgan Sogʻliqni saqlash vazirligi bosh transplantologi Poʻlat Sultonovning taʼkidlashicha, 31 yoshli ushbu bemor bir necha yil gemodializ muolajasi yordamida davolanib kelgan. Ayni vaqtga kelib, tashxis terminal bosqichga oʻtgani sababli uni hayotga qaytarishning yagona usuli sifatida buyrak koʻchirib oʻtkazish amaliyoti tavsiya etilgan. 

Qayd etilishicha, bemor hozirda transplantolog mutaxassislar tibbiy kuzatuvi ostida boʻlib, uning buyrak faoliyati tiklanishida ijobiy oʻzgarishlar kuzatilmoqda. Shuningdek, unga donorlik qilgan otasi X.Safarovning salomatligi ham kundan kun yaxshilanib boryapti.

• Buxoro
• Transplantatsiya