Bugun, 23-iyul kuni ijtimoiy tarmoqlarda “60 gradus issiqda Chaqaloq bug‘doyzorga tashlab ketilibdi” sarlavhasi ostida murojaat tarqaldi. Buxoro viloyati Ichki ishlar boshqarmasi matbuot xizmati ushbu hodisa yuzasidan rasmiy munosabat bildirdi.

Qayd etilishicha, 2022-yilning 22-iyul kuni soat 16:07 da viloyat IIBning “102” avtomatlashtirilgan tizimiga G‘ijduvon tumani Ko‘lijabbor MFY Ko‘xna Nayman qishlog‘ida joylashgan “Shukur To‘xta” fermer xo‘jaligining dala maydoni yoqasidagi (kapa) shiyponda shaxsi aniq bo‘lmagan taxminan 9 oylik bola topib olinib, tuman tibbiyot birlashmasiga olib borilganligi haqida xabar kelib tushgan.

Mazkur xabar G‘ijduvon tumani IIB Navbatchilik qismida qayd qilinib, tezkor tergov guruhi tomonidan hodisa sodir bo‘lgan joy ko‘zdan kechirilgan va kechiktirib bo‘lmas tergovga qadar tekshiruv harakatlari olib borilgan.

“Hozirgi kunda ushbu shaxsi aniq bo‘lmagan taxminan 9 oylik bola G‘ijduvon tuman tibbiyot birlashmasi bolalarni sog‘lomlashtirish bo‘limida shifokorlar nazoratiga olingan”,– deyiladi munosabatda.

 Xabarga ko‘ra, holat yuzasidan G‘ijduvon tuman Ichki ishlar boshqarmasi tomonidan tergovga qadar tekshiruv harakatlari amalga oshirilmoqda.

• Buxoro
• Chaqaloq
• Jazirama
• fermer
• issiq