Buxoro shahar A.Gʻijduvoniy koʻchasida yashovchi 2005-yilda tugʻilgan X.A. va Buxoro shahar A.Somiy koʻchasida yashovchi 2005-yilda tugʻilgan A.I. lar bir guruh boʻlib, oldindan jinoiy til biriktirib, Jondor tumanida yashovchi bir qizning behayo videolarini tarqatish va sharmanda qilish bilan qoʻrqitishgan.

2023-yil 6-fevral kunidan boshlab esa bir necha marotaba undan pul talab qilib olib, oxirgi marotaba talab qilingan 15.000.000 soʻmdan 9.900.000 soʻm miqdoridagi pullarni olgan.

Ammo shu bilan ham kifoyalanmasdan yana 4.100.000 soʻm miqdoridagi pullarni berishga majbur qilish darajasiga keltirib qoʻygan.

Qayd etilishicha, qizning Buxoro viloyati IIBga qilgan murojaati asosida oʻtkazilgan tezkor tadbir davomida ushbu ikki shaxs Buxoro shahar Pedagogika instituti oldida talab qilingan pullarni olgan vaqtida ashyoviy dalil bilan qoʻlga olingan.

Maʼlum qilinishicha, mazkur holat yuzasidan Oʻzbekiston Respublikasi JK.ning 165-moddasi 2-qismi bilan jinoyat ishi qoʻzgʻatilib, hozirgi kunda dastlabki tergov harakatlari olib borilmoqda.

• Buxoro
• IIB
• pul