Buxoro viloyati Vobkent tumanida 3-yanvar kuni harakatlanib ketayotgan yuk mashinasi yonib ketdi. Bu haqida Yo‘l harakati xavfsizligi bosh boshqarmasi axborot xizmati xabar berdi.

Ma’lum bo‘lishicha, hodisa soat 14:20 atrofida tuman hududidan o‘tuvchi M-37 avtomobil yo‘lining 241-kilometrida sodir bo‘lgan. Aniqlanishicha, haydovchi “Hyundai-Porter” yuk mashinasini boshqarib ketayotganda salonda yong‘in yuzaga kelgan va u mashinani zudlik bilan to‘xtatgan. Yong‘in o‘t uchiruvchilar tomonidan bartaraf etilgan.

Hodisada tan jarohati olgan fuqarolar yo‘q. Transport vositasiga zarar yetgan. Mazkur hodisa yuzasidan Vobkent tumani Favqulodda vaziyatlar bo‘limi va YHXB xodimlari tomonidan surishtiruv harakatlari olib borilmoqda.

• Buxoro