Buxoroda ko‘p miqdordagi “marixuana” oldi-sotdisi bilan bog‘liq jinoiy faoliyatning oldi olindi. Bu haqda viloyat Ichki ishlar boshqarmasi axborot xizmati ma’lum qildi.

Aniqlanishicha, Kogon tumani IIB JQB xodimlari tomonidan olingan tezkor ma’lumot asosida o‘tkazilgan “Qoradori-2023” tadbiri davomida Buxoro tumani Bog‘ikalon mahallasida yashovchi, 1981-yilda tug‘ilgan fuqaro Q.M. ismli shaxs tumanning Siyozpoyon mahallasi hududida boshqa bir fuqaroga Buxoro viloyati Ichki ishlar boshqarmasi Ekspert kriminalistika markazining sudga oid kimyoviy ekspertiza xulosasiga ko‘ra, 100 dona gugurt qutilarga solib qadoqlangan, sof vazni 307,28 grammga teng bo‘lgan, quritilgan holatda, ko‘p miqdordagi “marixuana” giyohvandlik vositasini 2 ming AQSh dollari evaziga qonunga xilof ravishda sotayotgan vaqtida ashyoviy dalillar bilan qo‘lga olingan.

Mazkur holat yuzasidan fuqaro Q.M.ga nisbatan O‘zbekiston Respublikasi Jinoyat Kodeksining 273-moddasi 5-qismi bilan jinoyat ishi qo‘zg‘atilib, dastlabki tergov harakatlari olib borilmoqda.

• Buxoro
• Giyohvandlik