2021-yilning 31-dekabr kuni Turkiyaning “Aksa Enerji” kompaniyasi tomonidan Buxoro viloyatining Buxoro tumanida qurilgan, quvvati 270 MVt bo‘lgan gaz-porshenli issiqlik elektr stansiyasining ilk qurilmasi ishga tushirildi.

Hozirda mazkur stansiyani O‘zbekistonning yagona elektr tarmog‘iga ulash bo‘yicha ishlar olib borilyapti.

Energetika vazirligi stansiya yaqin 2-3 kun ichida tarmoqqa quvvat uzata boshlashini ma’lum qildi.

Qayd etilishicha, ushbu issiqlik elektr stansiyasi Buxoro viloyatida birinchisi hisoblanadi. Stansiya yiliga 2,2 milliard kilovatt-soat elektr energiyasi ishlab chiqaradi.

Vazirlikka ko‘ra, mazkur loyihadagi energotejamkorlik yillik 260 million metr kub tabiiy gazni tejaydi.

“Loyiha qurilmalarining foydali ish koefisiyentining yuqoriligi hisobiga yillik 260 million metr kub tabiiy gaz tejaladi. Tejalgan tabiiy gazga qo‘shimcha 900 million kilovatt-soat elektr energiyasi ishlab chiqarish imkoni yaratiladi, buning natijasida (ushbu 900 million kilovatt-soat elektr energiyasi bilan) 450 ming xonadon elektr energiyasi bilan ta’minlanadi”, – deyiladi vazirlik xabarida.

Loyiha ishga tushishi natijasida, tumanda 100 nafar yangi ish o‘rni yaratilishi aytilmoqda.

• Buxoro
• Elektr energiyasi
• IES