“G‘ishtko‘prik” chegara bojxona postida 3 metrlik ilonni olib kirishga urinish fosh qilindi. Bu haqda Bojxona qo‘mitasi xabar qildi.

Unga ko‘ra, “G‘ishtko‘prik” chegara bojxona postida qo‘shni davlatdan kirib kelgan piyodaga tegishli qo‘l sumkasi nazorat-rentgen uskunasi orqali ko‘zdan kechirilganida, uning ichida bojxona xodimlarining og‘zaki so‘rovida va yo‘lovchi bojxona deklaratsiyasida ma’lum qilinmagan 1 bosh ilon borligi aniqlangan.

3 metr uzunlikdagi mazkur ilon dastlabki ma’lumotlarga ko‘ra, yo‘lbarssimon albinos bo‘g‘ma iloni bo‘lib, asosan Janubiy va Janubiy-sharqiy Osiyoda yashaydi.

Xalqaro Qizil kitobga kiritilganligi sababli mazkur jonivorni O‘zbekiston olib kirishda xalqaro CITIES ruxsatnomasi talab etiladi. Ammo, yuqoridagi holatda yo‘lovchi bu kabi hujjatlarni bojxona xodimlariga taqdim qila olmagan.

Shu bois, holat yuzasidan bojxona organlari tomonidan surishtiruv harakatlari davom ettirilayotgani ma’lum qilindi.

Shuningdek, ilon Toshkent hayvonot bog‘iga topshirilgan bo‘lib, mutaxassislar uning holatini barqaror deb baholashmoqda.

• Chegara
• ilon