Britaniyaning “The Telegraph” nashri manbalari Buyuk Britaniya rasmiylari rossiyalik tadbirkor Roman Abramovichning “Chelsi” futbol klubini sotishdan olgan 2,3 milliard funt sterlingni (taxminan 2,8 milliard dollar) Ukrainaga o‘tkazishga yaqin ekanini xabar qildi.

Qayd etilishicha, mablag‘lar jabrlangan ukrainaliklarni qo‘llab-quvvatlash uchun yangi tashkil etilgan jamg‘armaga yo‘naltirilishi rejalashtirilgan. Bu zamonaviy tarixdagi mojaro qurbonlariga qilingan eng katta xayriyalardan biri bo‘ladi.

Nashr suhbatdoshlarining ta’kidlashicha, transfer yaqin haftalarda amalga oshirilishi mumkin: Xayriya komissiyasi allaqachon jamg‘armaning tashkil etilishini amalda ma’qullagan.

“Shubhasiz, ular ham Yevropa Ittifoqidan yashil chiroq yoqishlari kerak, chunki Abramovich ham sanksiyalar ostida”, – deyiladi maqolada.

Yangi tashkilot rahbari sifatida Buyuk Britaniyadagi UNICEF’ning sobiq ijrochi direktori Mayk Penrouz tayinlanishi rejalashtirilgan. Uning nomzodini Britaniya hukumati ham, Abramovichning o‘zi ham kelishib olgan. Jamg‘arma boshqaruviga gumanitar va biznes sohalarining taniqli arboblari ham kiritilgan.

Avvalroq yaratilayotgan jamg‘arma jabrlangan rossiyaliklarga ham, jabrlangan ukrainaliklarga ham, DXR va LXR rezidentlariga ham yordam berishi haqida xabar berilgan edi. Uni yaratish g‘oyasi milliarderning o‘ziga tegishli bo‘lib, u buni birinchi marta “Chelsi”ni sotuvga qo‘yganida ma’lum qilgan.

“Chelsi”ni sotish

Abramovich futbol klubini 2003-yilda 140 million funt sterlingga sotib olgan. O‘shandan beri “Chelsi” besh marta Angliya Premyer-ligasi (APL) g‘olibi bo‘ldi, ikki marta Chempionlar Ligasi, Yevropa Ligasi, besh marta Angliya kubogi va uch marta Angliya liga kubogini qo‘lga kiritgan.

Rossiyaning Ukrainadagi maxsus operatsiyasi boshlanganidan bir hafta o‘tib Abramovich klubni sotishdan tushgan barcha mablag‘ni qurbonlarning yaqinlari va jangovar harakatlar natijasida jarohatlanganlarga yordam ko‘rsatish uchun maxsus fondga o‘tkazishga tayyorligini ma’lum qildi. 30 may kuni “Chelsi” mulkdorning rasmiy o‘zgarishini tasdiqladi: aktiv Todd Bouli boshchiligidagi konsorsium va “Clearlake Capital” investisiya kompaniyasi tomonidan sotib olindi.

Yevropa Ittifoqi Rossiyaning harakatlariga javoban aktivlarini muzlatib qo‘ydi va 1000 dan ortiq Rossiya fuqarolari, jumladan, 30 dan ortiq yirik tadbirkorlarning uyushma hududiga kirishini taqiqladi. Yevrokomissiya ma’lumotlariga ko‘ra, shu kungacha Yevropa Ittifoqi mamlakatlarida deyarli 10 milliard yevro muzlatib qo‘yilgan. Abramovich ham sanksiyalar ro‘yxatida. Keyinroq Angliya premyer-ligasi rahbariyati tadbirkorni futbol klubi rahbari lavozimidan chetlatdi.

• Buyuk Britaniya
• Chelsi
• Ukraina