Majburiy ijro byurosi Jizzax viloyati boshqarmasining qidiruv shoʻbasi tomonidan qarzdor va ularning mol-mulklarini topish yuzasidan tegishli choralar ko‘rilmoqda.

Xususan, olib borilgan tezkor tadbirlarda 340 nafar aliment to‘lashdan bo‘yin tovlab kelayotgan qarzdor fuqarolar, shuningdek, qidiruvda bo‘lgan 729 ta avtotransport vositalari topilgan.

Tezkor tadbirlar natijasida topilgan 156 nafar qarzdor fuqarolar aliment pullarini to‘lab bermaganligi sababli, ularga nisbatan ma’muriy javobgarlik masalalari hal etilgan, 163 nafari mavjud qarzdorligini to‘lagan hamda 21 nafar qarzdorlar o‘z oilalari bilan yarashtirilgan.

Shuningdek, ish yurituvda bo‘lgan ijro ishlari yuzasidan 158 nafar qarzdor jismoniy shaxslarni qidirib topish choralari ko‘rilmoqda.

Qidiruvga berilgan ushbu shaxslardan 82 nafari chet elga turli maqsadlarda chiqib ketganligi aniqlangan va ularga nisbatan davlatlararo qidiruvni amalga oshirish bo‘yicha so‘rovnomalar yuborilgan.

Bundan tashqari, 76 nafar mahalliy qidiruvga berilgan qarzdorlarni topish bo‘yicha tegishli huquqni muhofaza qilish idoralari bilan hamkorlikda ish olib borilmoqda.

• Aliment
• IIB
• IIBB
• Jizzax