Yangi ishga kirayotgan chet tili o‘qituvchilariga В2 darajadagi sertifikat talabi 2023/2024 o‘quv yilidan tatbiq etiladi. Bu haqda Xalq ta’limi vazirligi xabar berdi.

O‘zbekiston Respublikasi Vazirlar Mahkamasining 2021-yil 19-maydagi 312-son qaroriga asosan, 2022/2023-o‘quv yilidan boshlab davlat ta’lim muassasalarining xorijiy tillar o‘qituvchisi lavozimiga ishga qabul qilinayotgan nomzodlar kamida B2 darajadagi milliy yoki unga tenglashtirilgan mos darajadagi xalqaro sertifikatga ega bo‘lishi lozim.

“Mazkur qoidaning amaliyotga joriy etilishi natijasida ayrim hududlarda chet tili fani o‘qituvchilarining umumta’lim maktablariga ishga qabul qilinishida muammolar yuzaga kelishi va o‘qituvchilarning yetishmovchiligi kuzatilmoqda.

Ko‘plab murojaatlarni inobatga olib, shuningdek, maktablarda xorijiy tillarni o‘qitish jarayoni davomiyligini ta’minlash maqsadida Hukumat tomonidan В2 darajadagi milliy yoki xalqaro sertifikatga ega bo‘lmagan cheti tili fani o‘qituvchilarining umumta’lim maktablariga ishga qabul qilinmasligi xususidagi talab 2023/2024 o‘quv yilidan kuchga kirishi yuzasidan topshiriq berildi”, – deyiladi xabarda.

XTV o‘qituvchilardan maktablarda ta’lim sifati va pedagoglarning bilimiga belgilangan talablarga to‘liq javob berish uchun o‘z ustida ishlash va malakani oshirish choralari ko‘rishni so‘ragan.

Qayd etish mumkin, 2024/2025 o‘quv yilidan maktabdagi har qanday chet tili fani o‘qituvchisi В2 darajadagi sertifikatga ega bo‘lishi talab etiladi. O‘z navbatida S1 darajadagi xalqaro sertifikatga ega o‘qituvchilar ham ayni vaqtda oylik ish haqlarini 50 foizga oshirish imkoniyatiga ega.

• Chet tili
• Maktab
• Xalq ta'limi vazirligi