O‘z vazifasiga ma’sulyatsiz yonashgan tuman tibbiyot birlashmasi rahbari Tohir Mo‘minov o‘z lavozimidan ozod etildi.

Sog‘liqni saqlash vazirligi ishchi guruhi tomonidan Namangan viloyatida onalar va bolalar salomatligini ta’minlashga mas’ul tibbiyot muassasalari faoliyati tanqidiy o‘rganilmoqda.

Namangan viloyati Chortoq tumanida sentyabr oyida kunlik tug‘ilishlar soni o‘rtacha 20 taga ortib ketgani bois, shifoxonada o‘rin-joylar yetishmovchiligi yuzaga kelgan.

Ammo tuman tibbiyot birlashmasi rahbariyati tomonidan mazkur masalani hal etish bo‘yicha o‘z vaqtida kerakli chora-tadbirlar ko‘rilmagan. Oqibatda ushbu tug‘uruq bo‘limidagi palatalarda o‘rin-joylar sanitar-epidemiologik talablarga rioya etilmagan holda joylashtirilgan.

Ya’ni samarasiz ishlayotgan stasionar o‘rinlar hisobiga homilador ayollar uchun qo‘shimcha o‘rin-joylar yaratish imkoniyati mavjud bo‘la turib, tuman tibbiyot birlashmasi rahbariyati mazkur muammoga sovuqqonlik bilan yondashgan.

Ana shularni inobatga olgan holda, ish faoliyatida jiddiy kamchiliklarga yo‘l qo‘ygan Chortoq tuman tibbiyot birlashmasi rahbari vazifasini bajaruvchi Tohir Mo‘minov egallab turgan lavozimidan ozod etildi.

O‘z navbatida, yuzaga kelgan muammoli vaziyatni tezkor bartaraf etish maqsadida tuman tibbiyot birlashmasidagi samarasiz ishlayotgan stasionar o‘rinlar hisobidan tug‘uruq bo‘limi uchun qo‘shimcha yana 20 ta, jami 70 ta o‘rin-joy ajratilgan.

• Chortoq
• Namangan
• SSV