Ozarbayjonning Boku shahrida bo‘lib o‘tayotgan COP-29 anjumani doirasida O‘zbekiston Energetika vazirligi va Birlashgan Arab Amirliklarining “Masdar” kompaniyasi o‘rtasida Navoiy viloyatining Uchquduq tumanida quvvati 1000 MVt bo‘lgan shamol elektr stansiyasini qurish loyihasini amalga oshirish bo‘yicha shartnoma imzolandi.

Mazkur elektr stansiya qurilish jarayonida 600-800 ta yangi ish o‘rni yaratiladi. Loyihani amalga oshirish natijasida yiliga 3,5 milliard kVt soat elektr energiyasi ishlab chiqariladi. Buning evaziga 1 milliard kub metr tabiiy gaz zaxiralari tejaladi.

Loyiha O‘zbekiston uchun nafaqat iqtisodiy foyda, balki atrof-muhit himoyasi uchun ham katta ahamiyatga ega. Mazkur shamol elektr stansiyasini qurish orqali atmosferaga chiqariladigan chiqindilar yiliga 1,4 million tonnaga kamayadi.

Ushbu shamol elektr stansiyasi hamkorlikning yangi bosqichi bo‘lib, u O‘zbekistonga energetika xavfsizligini ta’minlash, yangi ish o‘rinlarini yaratish hamda iqtisodiy o‘sishni ta’minlash imkoniyatini beradi.

BAAning “Uch baravar ko‘p qayta tiklanuvchi energiya quvvatlarini yaratish” tashabbusi bilan birgalikda, yurtimiz dunyo miqyosida iqlim o‘zgarishiga qarshi kurashishga qaratilgan harakatlarga qo‘shiladi.

O‘zbekiston, o‘z navbatida, Parij shartnomasi maqsadlarini qo‘llab-quvvatlaydi va qayta tiklanuvchi energiya sohasidagi global hamkorlikni kengaytirishni maqsad qilgan.

• BAA
• Elektr stansiya