Amerika Mikrobiologiya jamiyati olimlari koronavirusning “alfa”, “delta” va “omikron” shtammlari kemiruvchilar nafas yoʻllarida koʻpayishini aniqladi.

Xususan, Nyu-York shahridagi kulrang kalamushlarning 16,5 foizdan ortigʻi COVID-19 bilan kasallangani aytilmoqda. Bu esa kelgusida virusning jonivorlardan odamlarga yuqish xavfini oshirishi mumkin.

Shu bois mutaxassislar pandemiyaning yangi toʻlqini avj olmasligi uchun kalamushlar populyatsiyasini nazorat qilish zarur, deb hisoblamoqda.

Qolaversa, Kolumbiyaning Missuri universiteti professori Van Syufen kemiruvchilar orasida insonlar uchun qoʻshimcha xavf tugʻdiruvchi yangi mutatsiyalar paydo boʻlish ehtimolini tadqiq etish lozim, degan xulosada.

Eslatib oʻtish mumkin, yaqinda Fransiyada oʻtkazilgan tadqiqot natijasida uy mushuklarining taxminan 10 foizi SARS-CoV-2 bilan kasallangani aniqlangan edi.

• AQSh
• COVID-19