So‘nggi kunlarda Toshkent shahrida koronavirusga chalinish holati keskin ortib, bemorlar soni 5 ming 600 nafarga yetdi. Bugungi kunda bemorlarning 3 ming 297 nafari statsionar, 2 ming 216 nafari ambulator sharoitda davolanmoqda. Poytaxtdagi mavjud vaziyatni hisobga olib, joriy yil 13-yanvardan tumanlarda tun-u kun faoliyat ko‘rsatadigan 12 ta ixtisoslashtirilgan maxsus kovid poliklinikalari ish boshlagan.

Ma’lum bo‘lishicha, joriy yil 17-yanvar kuni ishchi guruhlar tomonidan Toshkent shahridagi 305 ta tadbirkorlik subyekti va 203 ta byudjet tashkilotida tekshiruvlar o‘tkazildi. Natijada tadbirkorlik subyektlarining 359 nafar, byudjet tashkilotlarining 885 nafar xodimi vaksina olmagani aniqlangan.

COVID-19 koronavirusiga qarshi vaksina olmagan 1 ming 44 nafar xodim vaqtinchalik ishdan chetlatildi, 200 nafariga jarimalar qo‘llanildi, 1 ta obyektning ish faoliyati vaqtinchalik to‘xtatildi, deyiladi xabarda.

Bundan tashqari, Milliy gvardiya tomonidan Toshkent shahrida faoliyat yuritayotgan 65 ta bozor, 31 ta istirohat bog‘i va xiyobonlar, 46 ta ommaviy tadbirlar o‘tkaziladigan obyektlar, 22 ta stadion va sport majmualari, 6 ta yirik savdo markazi va 131 ta jome’ masjidida fuqarolarga karantin qoidalariga rioya qilish yuzasidan targ‘ibot-tashviqot ishlari amalga oshirildi.

Xususan, mazkur chora-tadbirlar chog‘ida ushbu targ‘ibot ishlari poytaxt aholisi o‘rtasida koronavirus infeksiyasi keng tarqalishining oldini olishga qaratilgani ta’kidlangan. Shuningdek, barcha fuqarolardan karantin talablari va sanitariya-gigiyena qoidalariga qat’iy rioya qilish so‘raldi.

• Toshkent
• koronavirus