Rasmiy Kopengagen qisman tan olingan Kosovo respublikasidagi qamoqxonaning 300 ta kamerasini 10 yilga ijaraga oladi.

Joriy yil 20-dekabr kuni tomonlar kelishuvni 2022-yil boshida yakunlashga kelishib, anglashuv memorandumini imzolagan. Qirollik hududida jinoyat sodir etgan va deportatsiya qilinishi lozim bo‘lgan xorijliklar Daniyadan Kosovoga yuborilishiga qaror qilindi.

 “Bizning maqsadimiz sud qarori bilan Daniyadan chiqarib yuborilishi lozim bo‘lgan mahkumlarni Kosovoga jo‘natishdir. Ammo biz terror yoki harbiy jinoyatlari uchun sudlanganlarni u yoqqa jo‘natmaymiz”, – deydi Daniya adliya vaziri Nik Xekerup.

Kosovo chet ellik mahbuslarni qabul qilgani uchun 10 yil davomida 210 million yevro oladi. Kosovo rahbariyati bu pulni allaqachon qayta tiklanadigan energiya manbalarini rivojlantirishga sarflashni e’lon qildi.

Daniya, o‘z navbatida, kelajakda ijarani kengaytirishi mumkinligini ham istisno qilmayapti. Shuningdek, rasmiy Kopengagen mahbuslarni Kosovoga o‘tkazish orqali ularning ozod etilganidan keyingi deportatsiya qilish bilan bog‘liq jarayonlar uchun ham javobgarlikni o‘z zimmasiga olmoqda.

• Daniya
• Kosovo
• Qamoqxona
• Xorij