Andijon viloyati perenatal markazida 12 tup nina bargli sosna daraxtlari 16-yanvarga o‘tar kechasi kesib tashlandi. Viloyat hokimligi axborot xizmati holat nazoratga olingani hamda o‘rganish ishlari olib borilayotganini ma’lum qildi.

Shuningdek, tug‘uruqxonadagi qurilish loyihasiga ko‘ra, hozirgi kunda hududda 180 dan ortiq manzarali daraxt va ko‘chatlar ekish ishlari amalga oshirilmoqda. Bundan tashqari, hokimlik daraxtlar o‘z joyida turgani hamda hech kim ularni kesib tashlash to‘g‘risida buyruq bermaganini aytgan.

“Yuqorida keltirilgan holat viloyat hokimligi tomonidan alohida nazoratga olindi. Hududda konun buzilish holatlari aniqlangan taqdirda aybdorlarga qonuniy jazo choralari ko‘rilishi va bu haqida batafsil axborot berilishini ma’lum qilamiz”, – deyiladi xabarda.

Mazkur holat yuzasidan Ekologiya qo‘mitasi ham o‘z munosabatini bildirib o‘tdi. Ta’kidlanishicha, vaziyat yuzasidan viloyat Ekologiya va atrof-muhitni muhofaza qilish boshqarmasi hamda Ichki ishlar boshqarmasi mas’ul xodimlari tomonidan tezkor o‘rganish ishlari olib borilmoqda.

Xabarda keltirilishicha, mazkur hududdagi daraxtlarni kesishga qonunchilikda belgilangan tartibda ekologiya organi xulosasi va ruxsatnoma berilmagan. Qurilish obyekti davlat investitsiya dasturiga kiritilgan bo‘lib, tashkilot rahbariyati tomonidan uning hududidagi daraxtlarni kesishga ruxsatnoma olish uchun Davlat xizmatlari markaziga murojaat qilingan.

Ammo ushbu murojaat natijasini kutmasdan, qonunga zid ravishda o‘zboshimchalik bilan tunda ushbu huquqbuzarlik holati sodir etilgan. Hozirda surishtiruv ishlari davom etmoqda.

• Andijon
• hokim
• tabiat