Xabardor.uz manbasining maʼlum qilishicha, Bosh prokuror oʻrinbosari, Adliya katta maslahatchisi Akmalxoʻja Yusupovich Mavlonov Davlat bojxona qoʻmitasi raisi lavozimiga tayinlandi. 

Akmalxoʻja Mavlonov Prokuratura organlaridagi ish faoliyatini 2002-yilda Davlatobod tuman prokuraturasida boshlagan. Keyinchalik Namangan viloyati prokuraturasi organlarida turli lavozimlarda, 2006-yildan Bosh prokuratura boshqarma prokurori, katta prokurori lavozimlarida ishlagan.

2017-yilning martigacha Fargʻona viloyati Margʻilon shahar prokurori, 2017-yilda Sirdaryo viloyati prokurorining birinchi oʻrinbosari, 2017-2018-yillarda esa Xorazm viloyati prokurori lavozimlarida faoliyat yuritgan.

2018-yil fevral oyida Bosh prokuratura huzuridagi Iqtisodiy jinoyatlarga qarshi kurashish departamenti boshligʻi boʻlgan. Oʻsha yili avgust oyida bosh prokuror oʻrinbosari etib tayinlangan.

Akmalxoʻja Yusupovich 2019-yilning iyunidan 2020-yil kuzigacha Namangan viloyati prokurori lavozimida ishlagan. 2020-yil oktyabr oyida esa bosh prokuror oʻrinbosari lavozimiga qaytgan.

Eslatib oʻtamiz, avvalroq 2018-yil fevral oyidan buyon Davlat bojxona qoʻmitasiga rahbarlik qilib kelgan Murotjon Azimovning Qashqadaryo viloyati hokimi lavozimiga tayinlangani haqida xabar berilgan edi.

• Bojxona
• Tayinlov