Davlat xizmatiga ishga qabul qilish va unda faoliyat olib borishda qarindosh-urugʻchilik (nepotizm)ning oldini olish va unga yoʻl qoʻygan mansabdor shaxslarga nisbatan javobgarlik belgilashni nazarda tutuvchi qonun loyihasi jamoatchilik muhokamasiga taqdim etildi.

Korrupsiyaga qarshi kurashish agentligi tomonidan “Oʻzbekiston Respublikasining ayrim qonun hujjatlariga oʻzgartish va qoʻshimchalar kiritish toʻgʻrisida”gi qonun loyihasi ishlab chiqildi va jamoatchilik muhokamasiga taqdim etildi.

Loyihada oʻzaro yaqin qarindosh (toʻgʻri shajara) va quda-andalar, yon qarindosh (yon shajara) hamda qarindoshlik rishtasiga ega boʻlgan boshqa shaxslarning bir davlat tashkiloti va uning tuzilmalarida birga xizmat qilishlarining taqiqlanishi (Oʻzbekiston Respublikasi Mehnat kodeksi) va bunday holatlar uchun javobgarlik (Oʻzbekiston Respublikasining Maʼmuriy javobgarlik toʻgʻrisidagi kodeksi) belgilash taklif etilmoqda. 

Xususan, oʻzaro yaqin qarindosh (toʻgʻri shajara), qarindosh (yon shajara) yoki boshqa qarindoshlik munosabatlariga ega boʻlgan, shuningdek quda-anda boʻlgan shaxslarning (katta bobo-buvilar, bobo-buvilar, ota-onalar, oʻgʻil va qizlar, aka-uka, opa-singil, ularning bolalari, ota-onaning aka-uka va opa-singillari hamda ularning bolalari, bobo va buvilarning aka-uka hamda opa-singillari va ularning bolalari hamda shunga oʻxshashlar, shuningdek, er-xotinlarning katta bobo-buvilari, bobo-buvilari, ota-onalari, aka-ukalari, opa-singillari va bolalari), bir davlat tashkiloti va uning tarkibidagi tuzilmalarda biri ikkinchisiga bevosita boʻysunib yoki uning nazorati ostida xizmat qilayotganligi haqida ish beruvchiga maʼlum qilmaslik:

BHMning oʻn besh baravaridan yigirma baravarigacha miqdorda jarima solishga sabab boʻlishi;

oʻzaro yaqin qarindosh (toʻgʻri shajara), qarindosh (yon shajara) yoki boshqa qarindoshlik munosabatlariga ega boʻlgan, shuningdek quda-anda boʻlgan shaxslarning bir davlat tashkiloti va uning tarkibidagi tuzilmalarda biri ikkinchisiga bevosita boʻysunib yoki uning nazorati ostida xizmat qilayotganligi ish beruvchiga maʼlum boʻlgan vaqtdan boshlab, ushbu xodimlar ishlab kelgan ish (lavozim)ga teng boshqa ish (lavozim)ga oʻtkazish choralarini koʻrmaslik:

BHMning yigirma besh baravaridan oʻttiz baravarigacha miqdorda jarima solishga sabab boʻlishi belgilanmoqda.

Keltirilishicha, jamoatchilik muhokamasi 2021-yil 30-noyabrga qadar davom etadi.

• Aksilkorrupsiya
• Loyiha