Tegishli qonun loyihasi bilan Mehnat hamda Ma’muriy javobgarlik to‘g‘risidagi kodeksga o‘zgartish va qo‘shimchalar kiritiladi.

Mehnat kodeksiga kiritilayotgan o‘zgartirishga ko‘ra, o‘zaro yaqin qarindosh (to‘g‘ri shajara) yoki quda-anda bo‘lgan shaxslarning (katta bobo-buvilar, bobo-buvilar, ota-onalar, o‘g‘il va qizlar, nevara va evaralar, er-xotinlar, shuningdek er-xotinlarning ota-onalari, aka-ukalari, opa-singillari va bolalari), agarda ulardan biri ikkinchisiga bevosita bo‘ysunib yoki uning nazorati ostida xizmat qiladigan bo‘lsa, bir davlat korxonasi va uning tarkibidagi tuzilmalarda birga xizmat qilishlari taqiqlanadi.

Shuningdek, o‘zaro qarindoshlar (yon shajara)ning (aka-uka, opa-singil, ularning bolalari, ota-onaning aka-uka va opa-singillari hamda ularning bolalari, bobo va buvilarning aka-uka hamda opa-singillari va ularning bolalari hamda shunga o‘xshashlar), bir davlat tashkiloti va uning tarkibidagi tuzilmalar biri ikkinchisiga bevosita bo‘ysinuvida yoki uning nazorati ostida bo‘lganda xizmat qilishiga yo‘l qo‘yilmaydi.
Bunday hollarda davlat xizmatchisi o‘zaro qarindoshlik rishtalariga ega bo‘lgan shaxs bilan xizmat qilayotganligi o‘ziga ma’lum bo‘lgan vaqtdan boshlab 10 kun muddat ichida davlat tashkiloti rahbariga bu haqida xabar berishi lozim.

Mazkur moddada ko‘rsatilgan holatlar xodim bilan mehnat shartnomasi tuzilgandan so‘ng aniqlangan taqdirda, ish beruvchi ushbu xodimlardan birini, biri ikkinchisiga bevosita yoki uning nazorati ostida bo‘lmagan avvalgisiga teng boshqa ish (lavozim)ga o‘tkazish choralarini ko‘rishi shart.

Ma’muriy javobgarlik to‘g‘risidagi kodeksga kiritilayotgan o‘zgartirishga ko‘ra, bunday holatlar uchun ma’muriy javobgarlik ham belgilanmoqda.

Ya’ni Davlat xizmatiga qabul qilish va unda faoliyat olib borishda qarindosh-urug‘chilik munosabatlariga yo‘l qo‘yish BHMning 15 baravaridan 30 baravarigacha miqdorda jarima solishga sabab bo‘ladi.

• Korrupsiya