Bugun, 18-noyabr kuni Prezidentning tegishli farmonlari bilan bir qator tayinlovlar amalga oshirilmoqda.
Jumladan, Nurafshon shahrida bo‘lib o‘tishi aytilayotgan viloyat kengashining navbatdan tashqari sessiyasida shu kunga qadar Toshkent viloyati hokimi vazifasida faoliyat olib borgan Davron Hidoyatovning ishdan olinishi kutilmoqda.
Shu ma’noda Davron Hidoyatovning bugun, 18-noyabr sanasi bilan imzolagan qarori e’tiborga molik. Viloyat hokimi hokimlikdagi so‘nggi kunida “Avtotransport vositasini balansdan-balansga o‘tkazish to‘g‘risida”gi qarorni imzolagan.
Unga ko‘ra, Toshkent viloyati hokimligi balansidagi 2015-yilda ishlab chiqarilgan “Chevrolet Captiva” rusumli, davlat raqami belgisi 10 004 TVH bo‘lgan avtomashinani davlat raqami bilan Toshkent viloyati Ekologiya va atrof muhitni muhofaza qilish boshqarmasi balansiga tegishli tartibda o‘tkaziladi.
Qarorda aytilishicha, bu haqdagi 01/04-4801-sonli so‘rov xati Toshkent viloyati Ekologiya va atrof muhitni muhofaza qilish boshqarmasidan 2021-yil 4-noyabrda viloyat hokimligiga kelib tushgan.
Ma’lumot uchun, ayrim OAVlarda Davron Hidoyatovning hozirda bo‘sh turgan Ekologiya va atrof-muhitni muhofaza qilish davlat qo‘mitasi raisi lavozimiga kelishi aytildi.
Ekoqo‘mitaning sobiq raisi Alisher Maqsudov esa shu yilning 24-avgust kuni ishdan olingan edi.
Eslatib o‘tamiz, avvalroq lavozimidan olingan Navoiy viloyati hokimi Qobil Tursunovning hokim sifatidagi so‘nggi farmoyishi ham jamoatchilik e’tiboriga tushgan va unda viloyatdagi qator tashkilotlarga jami 22 mlrd 491 mln so‘m mablag‘ ajratib berilgan edi.
O‘zbekiston va jahonda ro‘y berayotgan eng so‘nggi voqea-hodisalar, sport, shou-biznes, madaniyat, informatsion texnologiyalar va ilm-fan yangiliklaridan doimo xabardor bo‘ling!
O‘zbekiston va jahonda ro‘y berayotgan eng so‘nggi voqea-hodisalar, sport, shou-biznes, madaniyat, informatsion texnologiyalar va ilm-fan yangiliklaridan doimo xabardor bo‘ling!