AOKAda 8-yanvar, shanba kuni FVV Davlat yong‘in nazoratini tashkil etish bosh boshqarmasi boshlig‘i O‘lmas Muzaffarov ishtirokida o‘tkazilgan brifingda Surxondaryo viloyati Denov tumanidagi “Indenim” savdo majmuasida bo‘lgan portlash yuzasidan hukumat komissisining xulosasi e’lon qilindi. 

Olib borilgan tadqiqot va tahlillar natijalariga ko‘ra, fojianing yuz berishiga sabab bo‘lgan omillar yuzasidan hukumat komissiyasining xulosasi taqdim etilgan. Xususan, savdo majmuasida sodir bo‘lgan chaqnash portlovchi moddalar qo‘llanilganligi natijasida sodir bo‘lmaganligini ma’lum bo‘lgan.

“Mazkur obyektda portlovchi moddalar qo‘llanilganligi o‘rganilganda, portlovchi moddalar izlari mavjud emasligi hamda portlashga xos bo‘lgan o‘zgarishlar, ya’ni, ‘voronka’ va portlatish qurilmasining bo‘laklari aniqlanmagan”, – degan O‘lmas Muzaffarov.

Xulosada aytilishicha, majmuada sodir bo‘lgan chaqnash majmua ostidan o‘tgan va foydalanishda bo‘lmagan gaz quvuridagi yoriqlardan tabiiy gazning sizib chiqishi natijasida portlash xavfi bo‘lgan gaz-havo aralashmasining hosil bo‘lishi va unga binodagi elektr jihozlarining avtomatlashtirilgan tartibda o‘chib-yonishida kuzatiladigan uchqunning ta’siri natijasida ro‘y bergan.

Ma’lum qilinishicha, “Indenim” savdo majmuasi binosining ostidan o‘tgan va foydalanishda bo‘lmagan gaz quvurining korroziya oqibatida hosil bo‘lgan yoriqlardan (6 joyidan 3-13 sm kattalikda) sizib chiqqan tabiiy gaz binoning ichki kismida gaz-havo aralashmasi yig‘ilishi natijasida chaqnash sodir bo‘lgani qayd etilgan.

FVV vakilining so‘zlariga ko‘ra, fojia oqibatida 2 nafar kishi qurbon bo‘lib, 9 nafari turli darajadagi tan jarohati olgan. Shuningdek, 140 ta turar joylarga, ya’ni 76 ta xovli uyi va 5 ta ko‘p qavatli uyning 64 ta xonadoni, 86 ta noturar joy, umumiy hisobda 226 ta imoratga ziyon yetgan. Talafot ko‘rgan 25 ta bino, jumladan, 13 ta turar joy va 12 ta noturar joy binoci yaroqsiz holatga kelgan.

• FVV
• denov