Xabardor.uz tahririyati qo‘lga kiritgan maʼlumotlarga ko‘ra, telekanalning barcha xodimlariga yo rus tili formatiga moslashish yoki boshqa ish qidirish taklifi berilgan.

Telekanal rahbariyati bu o‘zgarishni “rusiyzabon aholiga O‘zbekiston haqidagi xolis vaziyat va islohotlarni to‘laqonli yetkazish” deb izohlagan.

Shuningdek, MTRK raisi huzurida o‘tkazilgan majlisda bunga sabab millatlararo totuvlik va do‘stlik munosabatlari, deb taʼkidlangan. Majlis yakuniga ko‘ra, joriy yilning 1 iyulidan telekanal o‘z faoliyatini to‘liq rus tilida davom ettiradi.

Shu o‘rinda MTRK rahbariyatiga, jumladan, telekanal rahbari Nodir Tulyaganovga qator savollar paydo bo‘lmoqda: o‘zbekzabon aholi nima qilsin? 

O‘zbekistonning 90 foizidan ortig‘ini o‘zbek tilida so‘zlashuvchilar tashkil qilishi va 2022 yilda O‘zbekiston MTRK (jumladan, 23 ta hududiy bo‘linmalari) uchun xalq puli (byudjet)dan 561,4 mlrd so‘m ajratilayotgani yuqoridagi singari qarorlarni qabul qilayotganlarida eʼtiborga olinadimi-yo‘qmi?

Xodimlarni to‘satdan ishdan bo‘shatib yuborishga mehnat qonunchiligi yo‘l qo‘yadimi? 

O‘zbek tili va uning qadrini yuksaltirish haqidagi balandparvoz gaplarimiz qayerda qoldi?

Aziz o‘quvchi, izohlarda siz ham isteʼmolchi va soliq to‘lovchi sifatida o‘z fikrlaringizni yozib qoldiring! Zero, ayni vaziyatlarda jamoatchilikning fikri va qiziqishlari muhim.

• Dunyo bo‘ylab
• O‘zbek tili
• Telekanal