2022-yil yanvar oyidan boshlab 15 ta davlat o‘rtasida eng yirik savdo bitimi kuchga kirdi. Bu haqida BBC xabar berdi.

Qayd etilishicha, ushbu shartnoma sayyoradagi har uchinchi odamning daromadi o‘sishini va’da qiladi, shuningdek, globallashuv tarafdorlariga AQSh va Xitoyning proteksionizmi, koronavirus pandemiyasi bilan ajralib turgan bir necha og‘ir yillardan keyin global savdo va hamkorlikni jonlantirishga “umid beradi”.

Mintaqaviy keng qamrovli iqtisodiy hamkorlik (RCEP) kelishuvi Xitoy va Osiyo-Tinch okeani mintaqasi mamlakatlari, shuningdek Avstraliya, Yaponiya va Janubiy Koreyani birlashtirgan.

RCEP’ga asos solish to‘g‘risidagi shartnoma 2020-yil 15-noyabrda imzolangan. Uning kuchga kirishi qariyb 2,2 milliard iste’molchiga ega va yalpi ichki mahsuloti 28 trillion AQSh dollarga teng bo‘lgan dunyodagi eng yirik erkin savdo hududini yaratadi, bu jami jahon yalpi ichki mahsulotining 32 foizidan ortig‘ini tashkil etadi.

“AQSh va Yevropa Ittifoqidan keyin dunyodagi uchinchi yirik iqtisodiyot hisoblangan Xitoy hech qachon ko‘p tomonlama savdo bitimlarini imzolamagan”, deyiladi xabarda.

Shartnoma ishtirokchi davlatlar o‘rtasidagi savdo tariflarining 90 foizdan ko‘prog‘ini yo‘q qilishga qaratilgan bo‘lib, WSJ tomonidan so‘ralgan iqtisodchilar buni Osiyo-Tinch okeani mintaqasida savdoning rivojlanishi uchun muhim yangilik, biroq Qo‘shma Shtatlar uchun xavf qo‘ng‘irog‘i deb atagan.

Asia Society Policy Institute tahliliy markazi vitse-prezidenti Uendi Katlerning ta’kidlashicha, gap yangi qoidalar va standartlarni birgalikda ishlab chiqishga harakat qiladigan davlatlar guruhi haqida ketyapti. Qo‘shma Shtatlar esa boshqa yo‘nalishda harakat qilmoqda.

Bir qator tahlilchilarning fikricha, hamkorlik Xitoyga Osiyo-Tinch okeani mintaqasida Amerika manfaatlariga zarar yetkazadigan savdo qoidalarini o‘rnatishda qo‘l keladi.

• Jahon